Шинжлэх ухааны докторын диплом гардуулах ёслол болов
Ерөнхий консул Б.Ичинхорлоо 2025 оны 03 дугаар сарын 10-ны өдөр ОХУ-ын Шинжлэх ухааны академийн Сибирийн Эрчим хүчний систем судалгааны хүрээлэнд (Федеральное государственное бюджетное учреждение науки Институт систем энергитики им. Л.А.Мелентьевна Сибирского отделения Российской академии наук) Шинжлэх ухааны докторын диплом гардуулах үйл ажиллагаанд оролцов.
Монгол Улсын ШУТИС-ийн Эрчим хүчний инженерчлэлийн сургуулийн захирал Баярын Бат-Эрдэнэ “Монгол Улсын цахилгаан эрчим хүчний системийг шинэ нөхцөлд цогцоор нь хөгжүүлэх шинжлэх ухаан-арга зүйн үндэслэл” сэдвээр шинжлэх ухааны докторын зэрэг амжилттай хамгаалав.
Энэхүү шинжлэх ухааны докторын ажилд Монголын цахилгаан эрчим хүчний системийн хөгжлийн чиг хандлагыг шинжлэх ухааны үндэслэлтэйгээр тодорхойлохдоо систем шинжилгээний аргаар хөгжлийн шатлалын 4 түвшинг өөр хооронд нь уялдуулан авч үзэн 2050 оны түвшин дэх Монгол Улсын Эрчим хүчний нэгдсэн системийн загварыг боловсруулан гаргаснаараа онцлогтой юм байна.
Диссертацийн удирдагч, зөвлөхөөр монголын талаас Монгол Улсын Гавьяат багш, шинжлэх ухааны доктор, профессор, ШУТИС-ийн Дулаан техник, үйлдвэр экологийн хүрээлэнгийн эрдэм шинжилгээний удирдагч, ШУА-ийн жинхэнэ гишүүн, академич Сэрээтэрийн Батмөнх, оросын талаас ОХУ-ын ШУА-ийн Сибирийн салбарын Эрчим хүчний систем судлалын хүрээлэнгийн орлогч захирал, шинжлэх ухааны доктор, профессор Сергей Викторович Подковальников нар ажиллажээ.
С.В.Подковальников тус эрдмийн ажил нь зөвхөн Монгол Улсад төдийгүй ОХУ-ын эрчим хүчний хөгжилд хувь нэмрээ оруулахуйц шилдэг, сайн ажил болсныг тэмдэглэсэн юм.
Ерөнхий консул Б.Ичинхорлоо хэлсэн үгэндээ “Эрчим хүч бол аливаа улсын хөгжлийн суурь салбар юм. Монгол Улсын энэхүү чухал салбарын эрдэмтэн судлаачдыг олон жилийн турш дэмжиж, хамтран ажиллаж ирсэн ОХУ-ын Шинжлэх ухааны академийн Сибирийн Эрчим хүчний систем судалгааны хүрээлэнгийн үе үеийн удирдлага, эрдэмтэн судлаачдад гүн талархал илэрхийлье.
Манай хоёр улсын эрчим хүчний системийн хөгжил нягт холбоотой явж ирсэн билээ. Хоёр талын шинжлэх ухааны академийн хамтын ажиллагаанд Ерөнхий консулын газрын зүгээс бүх талаар дэмжин ажиллах болно” гээд шинжлэх ухааны докторын зэрэг амжилттай хамгаалсан Б.Бат-Эрдэнэ докторт баяр хүргэж цаашдын эрдмийн ажилд нь өндөр амжилт хүсэв.
Шинжлэх ухааны доктор Б.Бат-Эрдэнэ нь 6 жилийн турш судалгааны ажлаа бичиж хамгаалсан бөгөөд Монгол Улсаас эрчим хүчний чиглэлээр докторын зэрэг хамгаалсан 6 дахь, тэр дундаа ОХУ-ын Шинжлэх ухааны академийн Сибирийн Эрчим хүчний системийн хүрээлэнд хамгаалсан 5 дахь шинжлэх ухааны доктор болсон бол түүний дипломын удирдагч багш С.Батмөнх нь тус институтэд шинжлэх ухааны доктор хамгаалсан анхны Монгол доктор болохыг онцоллоо.
