“Цагаан сар” арга хэмжээг зохион байгуулав.

Ерөнхий консулын газраас Эрхүү хотын Судалгаа, техникийн их сургуультай хамтран, Монголын уламжлалт сар шинийн баяр, ёе заншил, өв уламжлал, тоглоом наадгайн талаар гадаад оюутнуудад сурталчлан таниулах “Цагаан сар” арга хэмжээг 2025 оны 03 дугаар сарын 04-нд Судалгаа, техникийн их сургууль дээр бүтэн өдрийн турш амжилттай зохион байгууллаа. Тус арга хэмжээг нээж Ерөнхий консул Б.Ичинхорлоо, Эрхүү мужийн Хууль тогтоох хурлын дэд дарга К.Р.Алдаров, Судалгаа, техникийн их сургуулийн захирал М.Корьняков нар үг хэлэв.

Тус арга хэмжээнд ОХУ-ын Эрхүү хотноо  суралцаж буй Монгол оюутан залуус, ОХУ-ын Буриад улсын их сургуулийн оюутнууд хамтран Монгол, буриад ардын болон орчин үеийн дуу, бүжгийн тоглолтыг сонирхууллаа. Тус арга хэмжээг Эрхүүгийн бусад их, дээд  сургуулийн нийт 1000 гаруй оюутан залуус үзэж сонирхов.

Арга хэмжээний үеэр Монгол гэрийн тухай, Монгол ардын уламжлалт тоглоом наадгайгаар хэрхэн тоглох талаар болон Монгол бичгийн таталган, уран бичлэгийн үзүүлбэрийг үзүүлсэн нь бусад орны оюутан залуусын сонирхолыг ихээр татаж байв.