“ПАЛИТРА МОНГОЛЬСКОЙ ДУШИ” ҮЗЭСГЭЛЭН В.П.СУКАЧЕВЫН НЭРЭМЖИТ ЭРХҮҮГИЙН УРЛАГИЙН МУЗЕЙД

20-21-р зууны Монгол ахуй, монгол хүний дотоод мөн чанар, байгалийн үзэсгэлэнг харуулсан уран зураг, график урлагийн 14 бүтээлийг дэлгэн харуулсан “Палитра монгольской души” үзэсгэлэн В.П.Сукачевын нэрэмжит Эрхүүгийн урлагийн музейд 2025 оны 08 дугаар сарын 06-ны өдөр нээлтээ хийв. Уг үзэсгэлэнгийн нээлтийн үйл ажиллагаанд Монгол Улсаас ОХУ-ын Эрхүү хотод суугаа Ерөнхий консул Б.Ичинхорлоо, Эрхүү хотод суугаа БНСУ-ын Ерөнхий консулын газрын Консул Ким С, ОХУ-ын ГХЯ-ны Эрхүү хот дахь төлөөлөгчийн газрын гуравдугаар нарийн бичгийн дарга Ю.Мсланина, Эрхүү хот дахь Монголын анд нөхдийн нийгэмлэгийн удирдах зөвлөлийн гишүүд, Эрхүү хотын иргэд оролцлоо.

Энэхүү үзэсгэлэн нь зүгээр нэг уран зургийн цуглуулга биш, дүрслэх урлагийн баялаг өв, орчин үеийн хөгжлийг харуулсан байна. Үзэсгэлэнг зөвхөн Монголын зохиолчдын бүтээлээр хязгаарлаагүй бөгөөд Монголын соёл урлагаас сэдэвлэн уран бүтээл туурвидаг Эрхүүгийн авьяаслаг мастеруудын монголын үзэсгэлэнт байгаль, ард иргэдийн өдөр тутмын ахуй амьдрал, уламжлалт баяр зэргийг судлан туурвисан бодитой бүтээлүүд тавигджээ.

В.П.Сукачевын нэрэмжит Эрхүүгийн урлагийн музейн гүйцэтгэх захирал Наталья Сергеевна Сысоева “Палитра монгольской души” үзэсгэлэн нь хоёр улсын соёл хоорондын яриа хэлэлцээний тод жишээ, үндэсний урлагийн сургуулиудыг хөгжүүлэх, бүтээлч хамтын ажиллагааг өргөжүүлэхэд ихээхэн хувь нэмэр оруулж буйг нээлтийн үгэндээ онцоллоо.